သုံးရောင်ခြယ်

သုံးရောင်ခြယ်
မာမာအေး
နိုဝင်ဘာ ၁၊ ၂၀၁၀

“ပြောပြစရာတွေလဲ တပုံကြီး ရှိသေးတယ်” အမှတ် (၃၅၃)
 

သောတရှင်များ ကျန်းမာတော်မူကြပါစရှင် - မာအေးချစ်တဲ့ သောတရှင်တွေ ဂီတ ဝါသနာရှင်တွေ အားလုံး မာအေးရဲ့ အသံလေး ကြားရတဲ့အခါမှာ ကိုယ်ရော စိတ်ပါ ချမ်းသာကြပါစေလို့ ဆုမွန်ကောင်း တောင်းလိုက်ပါတယ်။


သောတရှင်တို့ရေ မာအေးကတော့ အလွမ်းသီချင်းလေးတွေ ကြားချင်တယ် ဆိုတဲ့ BBC အချစ်တော် ပရိသဒ်တွေထဲက ကြားလာရတဲ့ အာသာ ဆန္ဒကို လိုက်ပြီးတော့ လွမ်းတာလေးတွေ သီကုံး ပြောလို့ မဆုံး ဖြစ်နေပြီ ထင်ပါရဲ့ရှင်။ ဒီမှာတင်ဘဲ အလွမ်းတွေကို တစ်စခန်းနေဦးစို့လို့ နားဖို့ရာ ကြံပေမယ့် ဟန်မရသေးဘူး ချစ်ဆွေတို့ရဲ့၊ လွမ်းရမှာတွေက ကြုံသကိုလေ ဖြစ်နေလို့ပေါ့။

ချစ်ဆွေတို့ တတွေလဲ ဒါလောက်ဆိုရင် သိပြီးလောက်ပြီ ထင်ပါတယ်။ မြို့မေတ္တာခံယူမယ့် မောင်မင်းသားကြီးတွေက လာမယ့် နိုဝင်ဘာလ ထဲမှာ ကြမ္မာ မျက်လှည့် အချဲ့ကြီး ချဲ့ဘို့ ကြံတော့ ပြည်မြန်မာရဲ့ အောင်လံတော်ဟောင်း “ကဒေါင်း”ကို ဖယ်၊ “ကြယ်ဖြူ”ကို အလယ်မှာသွင်း၊ ဗမာ့တော်လှန်ရေး မြေခံ “သုံးရောင်ခြယ်အလံ” က အရောင်တွေ အတိုင်း ထားစေခြင်း ဥပဒေထုတ်၊ အလံတော်သစ်ကြီး လုပ်တယ် တဲ့။

သီချင်းကတော့ ၀ိုင်အင်ဘီ ဆရာတင် ရေး သီကုံးတဲ့ “ဒို့ဗမာသီချင်း” ထဲက သံပြိုင်ပိုဒ်ရဲ့တေးသွား အလိုက် “ကမ္ဘာမကြေ အပိုဒ်”က အသံအတိုင်းဘဲ တဲ့။ မာအေး နားနဲ့ ဆတ်ဆတ် မကြားရဖူးသေးလို့ သေချာတဲ့ အခါ ပြန်ပြောပါ့မယ်။ ဟိုတုန်းက “တရားမျှတ လွတ်လပ်ခြင်းနဲ့ မသွေ ဒို့ပြေဒို့မြေ” အဲဒီလို ဗမာသံ ဗမာ အလိုက်နဲ့ စဆိုရတဲ့ အကြောင်း ပြောပြထားမိလို့ မှတ်တမ်းလေးတော့ ကျန်သေးသဟဲ့ပေါ့နော။ လူသားတိုင်း တရားမျှတ လွတ်လပ်မှုဆိုတာတွေ လိုအပ်ပါလျက် ဘာကြောင့်များ ဖျက်ခဲ့ပါလိမ့်၊ အတွေးမှာ ပေါ်မလာပါဘူး။

ပေါ်လာတဲ့ အတွေးကတော့ သီချင်း အကြောင်းမဟုတ်တဲ့ အလံ ကိစ္စပါဘဲ။ နောက်သုံးမယ့် အလံတော်သစ်ကို “တတိယ သုံးရောင်ခြယ်အလံ”လို့ ပြောဖို့ စိတ်ကူးမိနေလို့ပေါ့ရှင်။ စိတ်ကူးပေါ်သင့် မပေါ်သင့် တွေးချင့်ကြည့်စမ်းပါ။

ပထမ သုံးရောင်ခြယ်အလံမှာ နောက်ခံ အရောင်တွေက သုံးမျိုးပါ၊ အ၀ါရယ်၊ အစိမ်းရယ်၊ အနီရယ် ဖြစ်ပါတယ်။ ဒီ အရောင်သုံးမျိုးကို အကွာအဝေး ညီမျှစွာ ကန့်လန့်စင်း ဆွဲသားပြီး အလယ်ကောင်မှာ “ကဒေါင်း” ပုံပါရှင်။ ဒီအတွက် သုံးရောင်ခြယ် သီချင်း ရွှေတိုင်ညွှန့် ရေးခဲ့ပါတယ်။ ခေတ်ဟောင်းမှာ အဆိုတော်ကြီး မကြည်အောင်နဲ့ စိန်ပါတီတို့ သီဆိုထားတဲ့ ဓါတ်ပြားများ ရှိပါတယ်။ မာအေးကြိုက်တဲ့ နိုင်ငံရေး သီချင်းထဲမှာ ‘သုံးရောင်ခြယ်’ လဲ ပါတာပေါ့။ စင်ပေါ်နဲ့ ကားတွေပေါ်မှာတော့ ပြည်သူတွေကို ဆိုပြပြီးပါပြီ။ မှတ်တမ်း အဖြစ် သခင်၊ သခင်မကြီးတွေနဲ့ ဂီတပညာရှင်တွေ စုပေါင်း သိမ်းဆည်း ထုတ်လွှင့်တဲ့ အခါမှာ တပည့်ကျော် ခေတ္တရာ တမာချိုက ဆိုခွင့်ရသွားပါတယ်။ အလွမ်းပြေ နားထောင်ရအောင်ပါ။

ဗမာကိန်းအညီ၊ အ၀ါ၊ အစိမ်း၊ အနီ။ အ၀ါရောင်ရည်ရွယ်ချက်က ဘာသာရယ်၊ သာသာနာရယ်၊ ပညာရယ် တိုးလိမ့်မည်၊ အစိမ်းရောင် ဆိုတာကတော့ စပါးဆန်ရေ ရွှေငွေ အထွေထွေ ပေါမည်။ အနီရောင် မြင်သူ့အသည်းမှာ ရဲစိတ်ရဲမာန်ထက်သန်ကြမည်၊ အနီရောင်တွေကို မြင်သူ့အသည်း ရဲစိတ်ရဲမာန်ထက်သန်ကြမည် တို့ဗမာ- ကုန်းဘောင်နွယ်မှန်သည်၊ သုံးရောင်ခြယ် အလံတော်ကြီး ကဗ္ဗည်းနဲ့ စိုက်ထူမည် xxx
[ခေတ္တရာ တမာချို သီဆိုတဲ့ သုံးရောင်ခြယ်]

ကဲ .. ဒါကတော့ အများကြားဖူး ကြိုက်ဖူးတဲ့ သုံးရောင်ခြယ်ပေါ့ရှင်။ ဒုတိယ သုံးရောင်ခြယ် အလံလဲ ရှိတယ်ရှင့်။ အဲဒီ အလံက ၀ါစိမ်းနီပေါ်က ဒေါင်းပုံနေရာမှာ အလုပ်သမား လယ်သမားကိုယ်စားပြု တူနဲ့ တံဇင်ပုံပါတယ် တဲ့။ မာအေးကလဲ “လေးဆယ့်နှစ်” ကျမှ မွေးတာ ဆိုတော့ မမြင်လိုက်နိုင်ခဲ့ပါဘူး။ တို့ဗမာ အစည်းအရုံး အတွက် သီချင်းတွေ စုစည်း သီဆိုကြတဲ့ အခါကျတော့မှ သုံးရောင်ခြယ် တူတံဇင် အလံ အကြောင်း၊ တူတံဇင်သုံးရောင်ခြယ် သီချင်းတွေလဲ ရှိသေးကြောင်း သိခဲ့ရတာပါဘဲ။ ဘငြိမ်းချမ်း မှိုင်းဆရာကြီး ဦးစီးတဲ့ တို့ဗမာသခင်အဖွဲ့ကြီးလဲ နှစ်ဖွဲ့ဖြစ်ခဲ့သေးတာကိုး လို့ အသိလဲ တိုးရတာပေါ့လေ။ ဒါကြောင့်လဲ မူကွဲရှိခဲ့တဲ့ ဒုတိယ သုံးရောင်ခြယ်ကို ဆိုထားခဲ့ပါတယ်။ ပြဇာတ်ဝိဇ္ဇာ ဒဂုန်ဆရာတင် ရေးခဲ့တဲ့ တူတံဇင်သုံးရောင်ခြယ် သီချင်းပါ။ အဆိုတော်ကြီး မသိန်းဟန် အသံနဲ့ ခေတ်ဟောင်း ဓါတ်ပြားရှိပါတယ်။ ခုကတော့ မာအေး အသံနဲ့ ပေါ့နော။

ဝါစိမ်းနီ တူတံဇင် သီချင်းကိုဖြင့်၊ ဗမာကိန်း အညီ ဇမ္ဗူတခွင် ပွင့်လင်းစေဘို့၊ မောင်ရယ် … မူ အမြန်ရှင်းအောင်ပ ပြောပြချင်တယ် xx ဗမာ့ အလံကြီးရယ်ဟု ကမ္ဘာ့ရန်မီးတွေ အဖြာဖြာကွယ်ဘို့၊ သာသာနာနွယ်ဝါရောင်သုံးတယ် ဘုန်း … ဘုန်းတောက်လို့ကြွယ် xx ထူးထူးခြားခြား၊ ဗမာများ နေတဲ့ ဗမာတိုင်းပြေရဲ့ ကျက်သရေ အသွယ်သွယ်၊ သာသနာတော် ထွန်းရာအရပ်မို့ကွယ် အထက်က အ၀ါရောင်ခြယ်၊ သစ်ဝါး ရေနံ ကျောက်သံ စပါး ထွက်တယ်၊ စိုစို စိမ်းစိမ်း အထိမ်းအမှတ်ခြယ် သတ္တိဂုဏ် ရဲဂုဏ်ကိုသာ တကယ်၊ သွေးသစ် အနီရောင်ခြယ် (သုံးရောင်လွှမ်းခြယ် ဆန်းကျယ်၊ ခေတ်သစ် ထူထောင်နိုင်မယ်)၂ xx အောင် အောင်လံတော်ကြီး နိသျှည်းမြင်စေဘွယ်။
[သုံးရောင်ခြယ် - တူတံဇင်]

ဒါကတော့ ဒဂုန်ဆရာတင်ရေးတဲ့ တူတံဇင်သုံးရောင်ခြယ် သီချင်းထဲက ပါဘဲ။ ချစ်ဆွေတို့ကတော့ သုံးရောင်ခြယ် အလံသီချင်းတွေ အကြောင်း ပြောနေတာများ - လွမ်းစရာလားလို့ ထင်နေမှာမို့လား။ မာအေးအဖို့ကတော့ လွမ်းစရာ တကယ်ပါ။ ပြောမိတဲ့ အခါ အဲဒီသီချင်းတွေ အသံသွင်းတုန်းက တွေ့ခဲ့ရတဲ့ ဂီတညီအစ်ကို မောင်နှမတွေ၊ အသံသွင်းပေးတဲ့ လုပ်ဖေါ်ကိုင်ဖက်တွေကိုပါ မျက်စေ့ထဲမှာ ပြန်ပေါ်လာတတ်လို့ပါ။ မာအေးလွမ်းတာက အဲဒါမျိုး။ ဒီသီချင်းလေးမျိုးကလဲ သူ့ခေတ် သူ့အခါ ကုန်သွားခဲ့တာ ကြာမှဘဲ၊ ကိုယ်ကသာ နှုတ်မဆက်ရက်လို့ လိုက်လက်ရှာကြ နောက်ကြောင်း ပြန်တွေဖြစ်တော့ အလွမ်းသစ်တာပေါ့။ တူတံဇင် သုံးရောင်ခြယ် နောက်တပုဒ်ကို ဗိုလ်အောင်ဒင် မင်းသားကြီး ခင်မောင်ရင့် အသံနဲ့လဲ ဓါတ်ပြား သွင်းထားတာ ရှိပါတယ်။

အခု သုံးမယ့် အလံကလဲ အခုပြောနေတဲ့ သုံးရောင်ခြယ် နောက်ခံတွေ တူနေပါတယ်။ အလယ်ကောင်မှာ ကျတော့ “ကဒေါင်း” မဟုတ်ဖူး၊ “တူတံဇင်” လဲ မဟုတ်ဖူး၊ “ကြယ်ဖြူတပွင့်” ပြောင်းသွားတာ မြင်ရပါတယ်။ ဒါကြောင့် မာအေးက “တတိယသုံးရောင်ခြယ်” လို့ ခေါ်ချင်လာတာ ဖြစ်ကြောင်းပါရှင်။

(ဘီဘီစီ မြန်မာပိုင်း အသံလွှင့်ဌာနက ထုတ်လွှင့်ခဲ့သော ဆောင်းပါးကို ပြန်လည် ဖော်ပြသည်။ http://www.bbc.co.uk/burmese/programmes/2010/10/101028_mmaye28.shtml တွင် နားဆင်နိုင်သည်။)